23 de octubre de 2014

Amroth Rhymes fala galego.


Hoxe apetéceme escribir no meu idioma pero... Acaso o castelán non o é? Pois si... e non. Coñezo o castelán e a maioría dos contidos que consumo diariamente están nese idioma. Escribín sempre en castelán tamén, polo feito de chegar a máis xente e porque, queiras ou non, consumindo tanto contido, tes un dominio maior do idioma. Pero o conto é que eu falo galego de toda a vida e penso en galego. En contadas ocasións me fixo falta falar en castelán e incluso se me fai un pouco raro ter que facelo.

Antes de que me tachedes de nacionalista, gustaríame deixar clara a miña postura: Son galego e síntome galego, pero máis que galego son barbanzán (Do Barbanza, a miña comarca) e máis que nada pobrense (Da Pobra do Caramiñal). Son de patria chica, que queredes que lle faga? Pero por outra parte non teño problema algún con ser español, é máis, creo que España é unha unidade histórica e un Estado que funciona ben como tal, ainda que penosamente esteamos gobernados por mangantes, que iso é aparte. 

Por outra banda, estou completamente en contra da postura nacionalista de "pobriños nós". A literatura galega (xeralizando un pouco) está moi ligada históricamente a reivindicacións políticas dos propios autores referentes ós problemas sociais e culturais dos galegos. Isto, para que nos imos a enganar, pasa en todas as literaturas, non só coa literatura galega. O problema reside en que se toma o tema da defensa da cultura propia do colectivo galego coma un dogma de fe, que agrava os prexuicios que dominan a día de hoxe sobre o idioma.

Baixo o meu punto de vista, a millor forma de loitar contra o problema é evitar a vinculación da etiqueta do nacionalismo co uso do galego. Simplemente usala en todos os ámbitos da vida cotiá con normalidade. A Televisión de Galicia tivo un papel fundamental de normalización do uso da lingua, porque se usou de xeito normal. Non se difundiu nela ningún lema político de "usa o galego, o idioma da nosa terra". Non fixo falta. 

Agora ben, a TVG non debería ser o único medio notorio no que se empregue o galego. Temos unha televisión pública en galego fronte a milleiros de outras que están en castelán, e que poden ser elexidas pola audiencia como alternativa ó non interesarlle a programación que esta emite. Necesitamos máis alternativas en galego, máis medios. É unha aposta que eu mesmo rexeitei ó escribir en castelán dende un principio, pero é unha aposta que hai que poñer sobre a mesa, xa que, polo menos a min, gustaríame disfrutar de máis contido en galego.

Non falo só de televisión. A día de hoxe co auxe de Internet, quedando a televisión en segundo plano, necesitamos contidos de todo tipo na rede. Houbo aí atrás un proxecto anecdótico de facer vídeos para You Tube en galego: O "Proxecto Xoutube", que consistía en subir vídeos en galego de forma anecdótica e que durou ben pouco. Tamén un ex-compañeiro meu do (xa morto) proxecto de Comunidad Blogger, Sebas, que a dia de hoxe estase facendo notorio na escea booktuber (El Coleccionista de Mundos), abreu un canal en galego, pero quedou aí tamén como algo anecdótico.

A min ocurréuseme a idea de un multiblog en galego, xa que entre varios seriamos capaces de darlle bastante vida, pero quero darlle forma á idea para non cagala xa ó comezo do proxecto. O conto é que eu quero escribir máis en galego, ainda que sea publicar as miñas opinións noutro medio en galego e traducilas ó castelán logo no meu blog, pero quero darlle máis importancia ó meu idioma na miña vida, porque se todos pasamos del, xa sabemos o que pode pasar.

Ata logo e moita sorte,
Amroth Rhymes